यो गाउँपालिकामा गुफाहरु पनि प्रशस्त मात्रामा रहेका छन् । कतिपय गुफाहरु ऐतिहासिक, सांस्कृतिक तथा धार्मिक महत्वका छन् । यी गुफाहरुमा वडा नं. ३, सेर्तुङमा रहेका बाँदरन्यू गुफा, बुज्यूङ्गो गुफा, वडा नं. ४, बोराङमा रहेका गुफाहरुमा तेलगङ गुफा, गुह्लुङ गुफा, चोह्क्तीउह् गुफा, फ्ह्वाउह् गुफा, फाबाङउह् (चमेरेगुफा) रहेका छन् । वडा नं. ५, लापा ठूलो गाउँमा रहेको शेँगर्चो गुफा एक महत्वपूर्ण गुफा हो । यो गुफाको बारेमा भनाइ पनि रहेको पाइन्छ । एक समयमा यहाँ कुकुरको मूर्ति, ढुङ्गाको कचौरा थियो । यो गुफामा पस्दा जति पर गयो बिस्तारै उज्यालो हुँदै जाने हुन्छ भने गुफाको भित्र कुवा पनि रहेको छ भन्ने स्थानीयहरुमा विश्वास छ । पुर्खाहरुको भनाइअनुसार गुफाभित्र तामाङ बाहेकका अन्य जाति गएमा उज्यालो हुँदैन । त्यसरी नै यो गुफालाई कहिलाकाही सर्पले बाटो छेक्थ्यो भन्ने पनि विश्वास रहेको छ ।