यहाँका मुख्य खोलाहरुमा वाविल खोला (आदा खोला), मरस्याङ खोला (आँखु खोला), लप्सोङ खोला साथै देसेहेन खोला रहेका छन् । यी खोलाहरुको मुहान गणेश हिमाल सृङ्खला नै हो । यी खोलाहरु हिमाली स्वच्छ पानीका स्रोत हुन् । यी खोलाहरु विभिन्न जलीय तथा थलीय जीवहरुको बासस्थनहरुको रुपमा पनि रहेका छन् । यहाँ पानीओट, असलामाछा पाइन्छ भने विभिन्न प्रकारका पाहाहरु पाइन्छ । पाहालाई यहाँको तामाङ भाषामा पेहेङ भनिन्छ । यहाँ पाइने पाहाहरुमा उर पेहेङ, लुहु पेहेङ, मइ पेहेङ, सहा पेहेङ, रिक्सी पेहेङ, वलाहा पेहेङ र कमदुहुर्तु पेहेङ रहेका छन् । यहाँका बासिन्दाहरुमा पेहेङको सिकार गर्ने चलन पनि पाइन्छ । यससँगै विद्युत उत्पादन, खानेपानी स्रोतको रुपमा पनि यी खोलाहरुको महत्व पाइन्छ ।